ສາຂາ ສັດຕະວະແພດ ວິທະຍາໄລເຕັກນິກວິຊາຊີບມິດຕະພາບ ວຽງຈັນຮ່າໂນ້ຍ
ສັດຕະວະແພດ
ຫຼັກສູດ: ຊັ້ນກາງ 3 ປີ (9 + 3) | ຊັ້ນສູງ (12+3) 3 ປີ
ວິທະຍາໄລເຕັກນິກວິຊາຊີບມິດຕະພາບ ວຽງຈັນຮ່າໂນ້ຍ
ນິຍາມ ແລະ ຄວາມສຳຄັນ
ສາຂາສັດຕະວະແພດ ແມ່ນວິທະຍາສາດຂະແໜງໜຶ່ງ
ທີ່ສຶກສາກ່ຽວກັບສັດ ແລະ ການແພດສໍາລັບສັດ ເຊັ່ນ: ການປ້ອງກັນ, ບົ່ງມະຕິ ແລະ ການປິ່ນປົວພະຍາດ ແລະ
ການບາດເຈັບຂອງສັດປະເພດຕ່າງໆ. ສາຂານີ້ ມີຄວາມສໍາຄັນ ໃຫ້ແກ່ການສ້າງບຸກຄະລາກອນ
ໃຫ້ມີຄວາມສາມາດສະເພາະດ້ານໃນການຮັກສາສັດ ໂດຍສະເພາະແມ່ນສັດລ້ຽງ
ໃຫ້ມີສຸຂະພາບແຂງແຮງດີ. ນອກຈາກນັ້ນ, ສາຂານີ້ ຍັງມີຄວາມສໍາຄັນ ໃນການປ້ອງກັນການແຜ່ກະຈາຍຂອງພະຍາດ
ຈາກສັດສູ່ຄົນ ອີກດ້ວຍ.
ວິຊານີ້ຮຽນກ່ຽວກັບຫຍັງ
ສາຂາສັດຕະວະແພດ ຮຽນກ່ຽວກັບ ໂຄງສ້າງ ແລະ ສະລີລະສາດຂອງສັດ
ລວມທັງພຶດຕິກໍາ ແລະ ນິໄສຂອງສັດ ແຕ່ລະຊະນິດ ເພື່ອແນ່ໃສ່ການປ້ອງກັນ ແລະ ຄວບຄຸມພະຍາດ
ທີ່ເກີດຂື້ນກັບສັດ ເຊັ່ນ: ການບົ່ງມະຕິພະຍາດສັດ, ພະຍາດຕິດແປດຈາກສັດ ສູ່ ຄົນ, ໂພຊະນາການຂອງສັດ, ການກວດກາອະນາໄມ, ຜະລິດຕະພັນສັດ ແລະ ອື່ນໆ. ນອກນັ້ນ, ຍັງສຶກສາກ່ຽວກັບ
ສາເຫດ ແລະ ຕົ້ນຕໍຂອງພະຍາດສັດ ແລະ ວິທີການປີ່ນປົວທາງການແພດ ໃຫ້ແກ່ສັດ
ເປັນຕົ້ນແມ່ນ ວິທີການຜ່າຕັດສັດ.
ວິທີການສິດສອນ
ການຈັດວິທີການຮຽນ-ການສອນ ແມ່ນຈະລວມມີທັງພາກທິດສະດີ
ແລະ ພາກປະຕິບັດຕົວຈິງ
ໄປພ້ອມໆກັນເຊິ່ງພາກທິດສະດີທີ່ຢູ່ໃນຫ້ອງຮຽນນັ້ນຈະກວມເອົາ 50% ແລະ ປະຕິບັດຕົວຈິງ 50% ເຊັ່ນ: ຝຶກວິທີການບົວລະບັດ ແລະ ການປະຕິບັດຕໍ່ສັດ; ບົ່ງມະຕິພະຍາດ ແລະ ຜ່າຕັດສັດ; ມີການຂຽນບົດລາຍງານໃນວິຊາທີ່ກ່ຽວຂ້ອງ; ມີການວິໄຈໃນຫ້ອງທົດລອງ; ບາງວິຊາຈະໄດ້ລົງສໍາຫຼວດເພື່ອເກັບກຳສະຖິຕິ ແລະ
ສຶກສາວິທີການລ້ຽງສັດຢູ່ຕາມໝູ່ບ້ານ.
ທັກສະ/ຄວາມສົນໃຈ
ມີຄວາມຮູ້ພື້ນຖານ ທາງດ້ານວິທະຍາສາດທໍາມະຊາດ ເປັນຕົ້ນແມ່ນ
ຊີວະສາດ ແລະ ເຄມີສາດ; ເປັນຄົນ
ທີ່ມີຄວາມອົດທົນ, ຮັກ ແລະ
ມີຄວາມຜູກພັນທີ່ດີຕໍ່ສັດ; ມີທັກສະ
ໃນການວິເຄາະ ແລະ ມີຄວາມຄິດທີ່ລະອຽດອ່ອນ, ແລະ ມີຄວາມມັກ ແລະ ສົນໃຈ ຕໍ່ບັນດາປະເພດສັດ ກໍ່ຄື
ສາມາດເຮັດວຽກກັບສັດໄດ້.
ຈົບແລ້ວສາມາດ
ນັກສຶກສາທີ່ຮຽນຈົບໃນພາກວິຊານີ້ຈະມີທັກສະໃນການສິດສອນ
ຫຼື ຝຶກຊ້ອມທັກສະຕ່າງໆໃຫ້ແກ່ສັດ; ມີທັກສະ ໃນການສັງເກດ ແລະ ວິນິດໄສພະຍາດສັດ; ມີຄວາມຮູ້ໃນການປ້ອງກັນ ແລະ
ປິ່ນປົວພະຍາດທີ່ຈະເກີດຂຶ້ນກັບ ສັດ ລວມທັງພະຍາດທີ່ສາມາດຕິດຕໍ່ໃສ່ຄົນ
ແລະ ທັກສະໃນການກວດສອບ ເຊື້ອທີ່ປົນເປື້ອນໃນຜະລິດຕະພັນຈາກສັດ.
ອາຊີບ
ສາມາດປະກອບອາຊີບ ເປັນ ໝໍປົວພະຍາດສັດ ຫຼື ສັດຕະວະແພດ, ນັກຈັດການຟາມ, ນັກການຢາກ່ຽວກັບສັດ, ເປັນນັກຄົ້ນຄວ້າວິໄຈ ແລະ
ກວດສອບເຝົ້າລະວັງການລະບາດຂອງພະຍາດກ່ຽວກັບສັດ ແລະ ເປັນອາຈານສອນ
ສາຂາສັດຕະວະແພດ. ນອກຈາກນັ້ນ, ນັກສຶກສາ ຍັງສາມາດນໍາໃຊ້ຄວາມຮູ້ ເພື່ອເປີດຄລີນິກ ຫຼື
ຫ້ອງກວດພະຍາດສັດ ດ້ວຍຕົນເອງອີກດ້ວຍ.
ທີ່ຕັ້ງ ແລະ ຕິດຕໍ່
ວິທະຍາໄລ ເຕັກນິກວິຊາຊີບ ມິດຕະພາບ ວຽງຈັນ-ຮ່າໂນ້ຍ
ຖະໜົນໜອງບອນ, ບ້ານ ນາໄຊ, ເມືອງ ໄຊເສດຖາ, ນະຄອນຫຼວງວຽງຈັນ
ໂທ: 021 412461, ແຟັກ: 021 453126
ອີເມວ:
vihas@hotmail.com
ບໍລິການແລ່ນເອກະສານຕ່າງໆ ໃນ ສປປ.ລາວ 
