ສາຂາ ອິນຟໍເມຕິກ ຄຸ້ມຄອງຫ້ອງການ ວິທະຍາໄລເຕັກນິກ ວິຊາຊີບ ມິດຕະພາບ ວຽງຈັນ-ຮ່າໂນ້ຍ
ອິນຟໍເມຕິກ ຄຸ້ມຄອງຫ້ອງການ
ຫຼັກສູດ: ຊັ້ນກາງ 2 ປີ
ວິທະຍາໄລເຕັກນິກ ວິຊາຊີບ ມິດຕະພາບ ວຽງຈັນ-ຮ່າໂນ້ຍ
ນິຍາມ
ແລະ ຄວາມສຳຄັນ
ອີນຟໍເມຕິກຄຸ້ມຄອງຫ້ອງການໝາຍເຖິງ ການນໍາໃຊ້ວິທີການໃນການ ສ້າງ, ເກັບມ້ຽນ,
ຄົ້ນຫາ, ຈັດການ ແລະ ແລກປ່ຽນ ຂໍ້ມູນຂ່າວສານ ເຂົ້າໃນການບໍລິຫານຂໍ້ມູນ
ເພື່ອຄຸ້ມຄອງວຽກພາຍໃນຫ້ອງການ ເປັນຕົ້ນແມ່ນ ການຄຸ້ມຄອງເອກະສານ ເຂົ້າ-ອອກ ແລະ
ສະຖິຕິຕ່າງໆ. ສາຂານີ້ມີຄວາມສໍາຄັນ ໃຫ້ແກ່ວຽກງານການຄຸ້ມຄອງ ຂໍ້ມູນຂ່າວສານ ແລະ
ວຽກງານບໍລິຫານຫ້ອງການ ໃນທຸກຂົງເຂດໃຫ້ມີຄວາມສະດວກໃນການນໍາໃຊ້ ແລະ ດໍາເນີນໄປຢ່າງເປັນລະບົບ.
ວິຊານີ້ຮຽນກ່ຽວກັບຫຍັງ
ສາຂານີ້ຮຽນກ່ຽວກັບ ການນໍາໃຊ້ຄອມພິວເຕີ
ໂດຍສະເພາະແມ່ນລະບົບການເກັບກໍາຂໍ້ມູນຂ່າວສານຂອງລະບົບຄອມພິວເຕີ; ການຄຸ້ມຄອງຫ້ອງການ ເຊັ່ນ: ວິທີການຮ່າງເອກະສານ
ແລະ ການຄິດໄລ່ດ້ານບັນຊີຄອມພິວເຕີ; ວິທີການຈັດເກັບ ແລະ
ຄຸ້ມຄອງເອກະສານໃນຫ້ອງການ; ການຈັດພື້ນທີ່ເພື່ອວາງອຸປະກອນເຄື່ອງໃຊ້ໃຫ້ເໝາະສົມກັບພື້ນທີ່ຫ້ອງການ.
ນອກຈາກນີ້, ຍັງຈະໄດ້ຮຽນກ່ຽວກັບວຽກງານເລຂານຸການ
ເຊັ່ນ: ການຮັບ-ສົ່ງເອກະສານ, ການຈັດກອງປະຊຸມ ແລະ
ສໍາມະນາ ແລະ ອື່ນໆ.
ວິທີການສິດສອນ
ການສິດສອນຂອງສາຂານີ້ ລວມມີການບັນຍາຍທາງດ້ານທິດສະດີ 40% ແລະ ການປະຕິບັດຕົວຈິງ 60%; ມີການມອບ ຫົວຂໍ້ໃຫ້ນັກສຶກສາ ຄົ້ນຄວ້າ, ຂຽນບົດລາຍງານ ແລະ ນໍາສະເໜີ ໃນແຕ່ລະວິຊາ; ມີການມອບໃຫ້ນັກສຶກສາ ຮ່າງເອກະສານ ແລະ
ສ້າງຕາຕະລາງຄິດໄລ່ບັນຊີໃນລະບົບຄອມພິວເຕີ. ນອກນີ້, ຍັງມີການໄປທັດສະນະສຶກສາ ແລະ ລົງຝຶກງານຢູ່ຕາມ ຫ້ອງການຕ່າງໆ ເພື່ອໃຫ້ເຫັນໄດ້ເຖິງວຽກງານຂອງການຄຸ້ມຄອງຫ້ອງການຕົວຈິງ.
ທັກສະ/ຄວາມສົນໃຈ
ຄວາມຮູ້ພື້ນຖານທາງ ດ້ານຄະນິດສາດ,
ພາສາອັງກິດ
ແລະ ຄອມພິວເຕີພື້ນຖານ; ເປັນຄົນທີ່
ມີມະນຸດສໍາພັນດີ, ໃສ່ໃຈໃນລາຍລະອຽດ, ມີຄວາມອົດທົນ,
ມັກການຄຸ້ມຄອງ, ຈັດລະບຽບ ແລະ ຈັດການ; ມີທັກສະໃນການຕິດຕໍ່ສື່ສານ, ມີຄວາມ ສົນໃຈໃນ ລະບົບການເຮັດວຽກລັກສະນະຫ້ອງການ ແລະ
ການຈັດການຂໍ້ມູນ.
ຈົບແລ້ວສາມາດ
ສາມາດນໍາໃຊ້ ໂປຣແກຣມ Word, Excel ແລະ Power Point; ມີທັກສະໃນການຈັດເກັບຂໍ້ມູນໃນລະບົບຄອມພິວເຕີ
ແລະ ຈັດມ້ຽນເອກະສານຢ່າງເປັນລະບົບ;
ມີພື້ນຖານໃນການອອກແບບຕົກແຕ່ງຮູບພາບ, ກາໝາຍ ແລະ ສັນຍາລັກຕ່າງໆ; ຮູ້ວິທີການຈັດກອງປະຊຸມ, ສໍາມະນາ ແລະ ມີທັກສະໃນວຽກງານພິທີການ ເຊັ່ນ:
ໂທລະສັບ, ແຟັກ ແລະ ອີເມວ.
ອາຊີບ
ສາມາດປະກອບອາຊີບເປັນ ເລຂານຸການ;
ເປັນວິຊາການໃນວຽກງານທີ່ກ່ຽວຂ້ອງກັບຝ່າຍ
ຄຸ້ມຄອງ-ບໍລິຫານ; ເປັນພະນັກງານຝ່າຍບຸກຄະລາກອນ
ແລະ ຄຸ້ມຄອງຂໍ້ມູນຂ່າວສານ ໄດ້ທຸກຫ້ອງການ ທັງພາກລັດ ແລະ ເອກະຊົນ. ນອກຈາກນັ້ນ, ຍັງສາມາດປະກອບອາຊີບເປັນອາຈານສອນວິຊາທີ່ກ່ຽວຂ້ອງກັບສາຂາດັ່ງກ່າວ
ອີກດ້ວຍ.
ທີ່ຕັ້ງ ແລະ ຕິດຕໍ່
ວິທະຍາໄລ ເຕັກນິກວິຊາຊີບ ມິດຕະພາບ ວຽງຈັນ-ຮ່າໂນ້ຍ
ຖະໜົນໜອງບອນ, ບ້ານ ນາໄຊ, ເມືອງ ໄຊເສດຖາ,
ນະຄອນຫຼວງວຽງຈັນ
ໂທ: 021 412461, ແຟັກ: 021 453126
ອີເມວ: vihas@hotmail.com
ບໍລິການແລ່ນເອກະສານຕ່າງໆ ໃນ ສປປ.ລາວ 
