ສາຂາ ວິສະວະກຳໂຍທາ ຄະນະວິສະວະກຳສາດ ມະຫາວິທະຍາໄລແຫ່ງຊາດ
ວິສະວະກຳໂຍທາ
ຫຼັກສູດ: ປະລິນຍາຕີ 4 ປີ
ຄະນະວິສະວະກຳສາດ
ມະຫາວິທະຍາໄລແຫ່ງຊາດ
ນິຍາມ ແລະ ຄວາມສຳຄັນ
ວິສະວະກຳໂຍທາ ເປັນຂະແໜງການໜຶ່ງຂອງ ວິສະວະກໍາ
ທີ່ກ່ຽວຂ້ອງກັບການກໍ່ສ້າງ ແລະ
ປັບປຸງພັດທະນາໂຄງລ່າງພື້ນຖານເຊິ່ງຈະລວມທຸກໆຮູບແບບຂອງການກໍ່ສ້າງເຊັ່ນ: ບ້ານ, ອາຄານ, ຫົນທາງ, ຂົວ, ເຂື່ອນ, ຊົນລະປະທານ ແລະ ອື່ນໆ. ສາຂານີ້ ມີຄວາມສໍາຄັນຫຼາຍ ຍ້ອນວ່າ
ທຸກໆກິດຈະການຂອງການກໍ່ສ້າງ
ທີ່ມີຄວາມຈໍາເປັນຕໍ່ກັບການພັດທະນາເສດຖະກິດ-ສັງຄົມ
ຈະຕ້ອງມີນັກວິສະວະກອນເປັນຜູ້ອອກແບບຄວບຄຸມ
ເພື່ອຮັບປະກັນໃຫ້ການກໍ່ສ້າງ ມີຄວາມປອດໄພຕໍ່ຜູ້ຊົມໃຊ້.
ວິຊານີ້ຮຽນກ່ຽວກັບຫຍັງ
ສາຂານີ້ ຮຽນກ່ຽວກັບການຄິດໄລ່, ການອອກແບບ ແລະ ການກໍ່ສ້າງບ້ານ, ອາຄານ, ຫົນທາງ, ຂົວ, ເຂື່ອນ, ຊົນລະປະທານ ແລະ ອື່ນໆ
ໂດຍນັກສຶກສາຈະໄດ້ຮຽນຮູ້ເຖິງທຸກໆຂັ້ນຕອນ ຂອງການກໍ່ສ້າງ
ນັບຕັ້ງແຕ່ການປະສົມປູນ ແລະ ທົດລອງວັດສະດຸກໍ່ສ້າງ ຈົນເຖິງການຄິດໄລ່, ອອກແບບສິ່ງກໍ່ສ້າງ ແລະ ການວິເຄາະເຖິງ
ຜົນກະທົບຂອງການກໍ່ສ້າງຕໍ່ສິ່ງແວດລ້ອມອ້ອມຂ້າງ. ນອກຈາກນີ້ ນັກສຶກສາຍັງຈະໄດ້ຮຽນ
ກ່ຽວກັບການຈັດການ, ການດຳເນີນ
ແລະ ການບຳລຸງຮັກສາສິ່ງກໍ່ສ້າງອີກດ້ວຍ.
ວິທີການສິດສອນ
ນັກສຶກສາຈະໄດ້ຮຽນເນັ້ນໜັກໃສ່ທິດສະດີເພື່ອໃຫ້ກຳແໜ້ນໄດ້ເຖິງຫຼັກການທີ່ຖືກຕ້ອງ.
ຫຼັງຈາກນັ້ນນັກສຶກສາຈະໄດ້ທົດລອງຕົວຈິງໃນຫ້ອງແລັບໂດຍການສຶກສາ ແລະ
ທົດລອງນຳໃຊ້ວັດສະດຸກໍ່ສ້າງ, ການປະສົມເບຕົງ, ການທົດລອງດິນ, ການກໍ່, ໂບກ, ການທົດລອງສ້າງໂຄງສ້າງ, ການສ່ອງກ້ອງ ແລະ ອື່ນໆ ໂດຍມີອາຈານເປັນຜູ້ນຳພາ. ນອກຈາກນີ້, ນັກສຶກສາຍັງຈະໄດ້ຝຶກງານໂດຍ ເຮັດໜ້າທີ່ເປັນນາຍຊ່າງ ແລະ
ເປັນຜູ້ຊ່ວຍວິຊາການໃນສະໜາມກໍ່ສ້າງຕົວຈິງ.
ທັກສະ/ຄວາມສົນໃຈ
ມີຄວາມຮູ້ພື້ນຖານດ້ານ ຟິຊິກສາດ ແລະ ຄະນິດສາດ ດີພໍສົມຄວນ
ເພາະຈະມີການຄິດໄລ່ຫຼາຍ. ເປັນຄົນທີ່ມັກການເຮັດວຽກຕົວຈິງ ນອກສະຖານທີ່, ມີຄວາມກະຕີລືລົ້ນດ້ານວິທະຍາສາດທີ່ແນ່ໃສ່ການພັດທະນາໂຄງລ່າງພື້ນຖານ, ມີແນວຄິດໃໝ່ໆທີ່ແຕກຕ່າງ, ມີເຕັກນິກໄຫວພິບໃນການແກ້ໄຂບັນຫາ ແລະ
ມັກນຳໃຊ້ເຕັກໂນໂລຊີເພື່ອປັບໃຊ້ໃນການແກ້ໄຂບັນຫາ.
ຈົບແລ້ວສາມາດ
ມີຄວາມສາມາດດ້ານວິຊາການເຊັ່ນ: ສາມາດແຕ້ມແບບວິສະວະກຳ, ສາມາດອອກແບບອາຄານ, ສາມາດນຳໃຊ້ໂປຣແກຣມຄອມພິວເຕີສຳລັບວິສະວະກຳ, ສາມາດສຳຫຼວດ ແລະ ວັດແທກການກໍ່ສ້າງ; ສາມາດວິເຄາະໂຄງສ້າງ ແລະ ສາມາດອອກແບບຄອນກຣີດເສີມເຫຼັກ; ສາມາດວາງແຜນ, ປະເມີນລາຄາ ແລະ ບໍລິຫານໂຄງການກໍ່ສ້າງໄດ້.
ອາຊີບ
ສາມາດເຮັດວຽກດ້ານວິສະວະກຳໃນຫຼາຍດ້ານເຊັ່ນ:
ເປັນວິຊາການພາກສະໜາມ, ນັກສຳຫຼວດ, ນັກປະເມີນລາຄາ, ຜູ້ຄຸມໂຄງການກໍ່ສ້າງ ໄດ້ທັງໃນພາກລັດ ແລະ ເອກະຊົນເຊັ່ນ:
ບໍລິສັດກໍ່ສ້າງ, ບໍລິສັດສຳຫຼວດອອກແບບ, ບໍລິສັດທີ່ປຶກສາ, ກະຊວງໂຍທາທິການ ແລະ ຂົນສົ່ງ ແລະ
ສາມາດເປີດບໍລິສັດຂອງຕົນເອງ ຫຼື ເປັນອາຈານສອນກໍ່ໄດ້.
ທີ່ຕັ້ງ ແລະ ຕິດຕໍ່
ຄະນະ ວິສະວະກໍາສາດ
ວິທະຍາເຂດໂສກປ່າຫຼວງ ມະຫາວິທະຍາໄລແຫ່ງຊາດ
ບ້ານ ໂສກປ່າຫຼວງ, ເມືອງ ສີສັດຕະນາກ, ນະຄອນຫຼວງວຽງຈັນ
ຕູ້ ປ.ນ 3166 ໂທ: 021
951294 ແຟັກ:
021 314382.
ເວັບໄຊ໌
www.fe-nuol.edu.la
ແຫຼ່ງຂໍ່ມູນ: https://collegemajor.la/
ບໍລິການແລ່ນເອກະສານຕ່າງໆ ໃນ ສປປ.ລາວ 
