ສາຂາ ວິສະວະກຳໄຟຟ້າ ຄະນະວິສະວະກຳສາດ ມະຫາວິທະຍາໄລແຫ່ງຊາດ
ວິສະວະກຳໄຟຟ້າ
ຫຼັກສູດ: ປະລິນຍາຕີ 4 ປີ
ຄະນະວິສະວະກຳສາດ
ມະຫາວິທະຍາໄລແຫ່ງຊາດ
ນິຍາມ ແລະ ຄວາມສຳຄັນ
ວິສະວະກຳໄຟຟ້າ
ແມ່ນສາຂາໜຶ່ງຂອງວຽກງານວິສະວະກຳທີ່ພົວພັນກັບການຄວບຄຸມ, ນຳໃຊ້ ແລະ ອອກແບບ ລະບົບໄຟຟ້າ. ໄຟຟ້າ
ແມ່ນປັດໄຈສຳຄັນຫຼັກໃນການດຳລົງຊີວິດ ເພາະວ່າ ທຸກໆກິດຈະກຳໃນແຕ່ລະວັນຂອງຄົນ
ລ້ວນແຕ່ຈະຕ້ອງນຳໃຊ້ໄຟຟ້າເພື່ອອຳນວຍຄວາມສະດວກເຊັ່ນ: ການສ້າງຄວາມສະຫວ່າງໃນຍາມກາງຄືນ, ການຕິດຕໍ່ສື່ສານ, ຕະຫຼອດເຖິງວຽກງານໃນໂຮງງານອຸດສາຫະກຳຕ່າງໆ
ເຊິ່ງວິສະວະກຳໄຟຟ້ານີ້ຈະຊ່ວຍໃນການສະໜອງໄຟຟ້າ ໃຫ້ຖືກນຳໃຊ້ໄດ້ຢ່າງທົ່ວເຖິງ ແລະ
ປອດໄພ.
ວິຊານີ້ຮຽນກ່ຽວກັບຫຍັງ
ສາຂານີ້ ຮຽນກ່ຽວກັບຄວາມຮູ້ດ້ານໄຟຟ້າກໍາລັງຄື:
ການນຳໃຊ້,
ອອກແບບ, ຄວບຄຸມ, ບໍລິຫານ, ຄຸ້ມຄອງລະບົບໄຟຟ້າ ແລະ ການແຈກຈ່າຍພະລັງງານໄຟຟ້າ.
ໃນນັ້ນ ນັກສຶກສາຈະໄດ້ຮຽນ ພື້ນຖານວິສະວະກຳໄຟຟ້າ ແລະ ອຸປະກອນໄຟຟ້າຕ່າງໆ; ການທົດລອງອີເລັກໂຕຣນິກ; ການນໍາໃຊ້ ໂປຣແກຣມຄອມພິວເຕີເຂົ້າໃນການຄວບຄຸມລະບົບໄຟຟ້າ; ການຜັນປ່ຽນພະລັງງານໄຟຟ້າກົນຈັກ; ການອອກແບບຕາຂ່າຍໄຟຟ້າ ຕະຫຼອດເຖິງການຮຽນຮູ້ເຖິງການປ້ອງກັນລະບົບໄຟຟ້າກໍາລັງໃຫ້ມີຄວາມປອດໄພ.
ວິທີການສິດສອນ
ນັກສຶກສາຈະໄດ້ຮຽນທິດສະດີ ແລະ ມີການປະຕິບັດຕົວຈິງ
ຢູ່ພາຍໃນໂຮງຮຽນ ໂດຍເລີ່ມຈາກພື້ນຖານທີ່ກ່ຽວຂ້ອງກັບລະບົບໄຟຟ້າເຊັ່ນ:
ການປ່ຽນຫຼອດໄຟ, ການຕໍ່ປັກສຽບ, ການເດີນສາຍໄຟ, ການປ່ຽນສາຍໄຟພາຍໃນໂຮງຮຽນ; ນອກນັ້ນ ກໍ່ມີການລົງຕົວຈິງຢູ່ອຸດສາຫະກໍາເຊັ່ນ:
ການຕໍ່ລຽນ-ຕໍ່ຂະໜານ, ການທົດລອງເຄື່ອງຈັກມໍເຕີໄຟຟ້າ, ທົດລອງຄວບຄຸມລະບົບໄຟຟ້າຕົວຈິງ, ການເຊື່ອມຕໍ່ ແລະ ຕິດຕັ້ງໄຟຟ້າຢູ່ຕາມໂຮງງານອຸດສາຫະກຳ, ສະຖານີໄຟຟ້າ ແລະ ເຂື່ອນໄຟຟ້າຕ່າງໆ.
ທັກສະ/ຄວາມສົນໃຈ
ຄວາມຮູ້ພື້ນຖານແໜ້ນ ທາງດ້ານຄະນິດສາດ ແລະ ຟິຊິກສາດ
ເພາະວິຊາຕ່າງໆທີ່ຈະໄດ້ຮຽນ ແມ່ນຕ້ອງໄດ້ໃຊ້ພື້ນຖານຂອງທັງສອງວິຊານີ້; ມີທັກສະ ໃນການຄິດໄລ່; ເປັນຄົນ ມັກຄວາມທ້າທາຍ, ມັກການເຮັດວຽກນອກສະຖານທີ່, ມັກການປະຕິບັດຕົວຈິງ; ແລະ ມີຄວາມສົນໃຈ ໃນກົນໄກການເຮັດວຽກຂອງລະບົບໄຟຟ້າ
ແລະ ອຸປະກອນໄຟຟ້າ.
ຈົບແລ້ວສາມາດ
ມີຄວາມສາມາດໃນການບໍລິຫານລະບົບໄຟຟ້າ; ສາມາດອອກແບບຕາຂ່າຍໄຟຟ້າ; ສາມາດຕິດຕັ້ງລະບົບໄຟຟ້າໄດ້ ໃນອາຄານບ້ານເຮືອນ; ສາມາດຄວບຄຸມສະຖານີໄຟຟ້າ ແລະ ການຈ່າຍພະລັງງານໄຟຟ້າ; ມີທັກສະໃນການວິເຄາະລະບົບໄຟຟ້າກໍາລັງ; ແລະ ຮູ້ວິທີການ ໃນການຄວບຄຸມລະບົບໄຟຟ້າໃຫ້ມີຄວາມປອດໄພ
ແລະ ທົ່ວເຖິງ.
ອາຊີບ
ເປັນນັກວິສະວະກອນໄຟຟ້າກໍາລັງ ທີ່ກ່ຽວຂ້ອງກັບການຄວບຄຸມ, ບໍລິຫານ ແລະ ອອກແບບ ລະບົບໄຟຟ້າ, ຕາຂ່າຍໄຟຟ້າ ແລະ ການຄວບຄຸມຄວາມປອດໄພຂອງລະບົບໄຟຟ້າ; ແລະ ເປັນທີ່ປຶກສາດ້ານວິສະວະກໍາໄຟຟ້າກໍາລັງ
ຕາມສະຖານີໄຟຟ້າຕ່າງໆ, ຫ້ອງການໄຟຟ້າລາວ, ກະຊວງພະລັງງານ ແລະ ບໍ່ແຮ່, ບໍລິສັດຕິດຕັ້ງໄຟຟ້າ ແລະ ໂຮງຈັກໂຮງງານຕ່າງໆ.
ທີ່ຕັ້ງ ແລະ ຕິດຕໍ່
ຄະນະ ວິສະວະກໍາສາດ
ວິທະຍາເຂດໂສກປ່າຫຼວງ ມະຫາວິທະຍາໄລແຫ່ງຊາດ
ບ້ານ ໂສກປ່າຫຼວງ, ເມືອງ ສີສັດຕະນາກ, ນະຄອນຫຼວງວຽງຈັນ
ຕູ້ ປ.ນ 3166 ໂທ: 021
951294 ແຟັກ:
021 314382.
ເວັບໄຊ໌
www.fe-nuol.edu.la
ບໍລິການແລ່ນເອກະສານຕ່າງໆ ໃນ ສປປ.ລາວ 
