ສາຂາ ສ້າງຄູຊີວະສາດ ຄະນະສຶກສາສາດ ມະຫາວິທະຍາໄລແຫ່ງຊາດລາວ
ສ້າງຄູຊີວະສາດ
ຫຼັກສູດ ປະລິນຍາຕີ 4 ປີ
ຄະນະສຶກສາສາດ
ມະຫາວິທະຍາໄລແຫ່ງຊາດລາວ
ນິຍາມ
ແລະ ຄວາມສຳຄັນ
ສ້າງຄູຊີວະສາດ
ໝາຍເຖິງການສ້າງຄູເພື່ອການຮຽນ-ການສອນວິທະຍາສາດກ່ຽວກັບສິ່ງທີ່ມີຊີວິດໃນໂລກ.
ສາຂານີ້ມີຄວາມສຳຄັນ ໂດຍສະເພາະເມື່ອອີງໃສ່ສະພາບຕົວຈິງຂອງປະເທດລາວເຮົາ ແມ່ນເຫັນວ່າຄູສອນສາຍທໍາມະຊາດໃນຂັ້ນສຶກສາສາມັນແມ່ນຍັງຂາດເຂີນ.
ນອກຈາກນີ້ ຄູທີ່ສອນຢູ່ຊັ້ນມັດທະຍົມປາຍສ່ວນໃຫຍ່ຍັງເປັນຄູທີ່ບໍ່ທັນໄດ້ລະດັບ
ກໍ່ຄືເປັນຄູທີ່ຈົບແຕ່ຊັ້ນກາງ ແລະ ຊັ້ນສູງ ແຕ່ຍັງບໍ່ທັນຈົບ ປະລິນຍາເທື່ອ. ດັ່ງນັ້ນ, ຈຶ່ງມີຄວາມຮຽກຮ້ອງຕ້ອງການໃນການສ້າງບຸກຄະລາກອນດ້ານນີ້.
ວິຊານີ້ຮຽນກ່ຽວກັບຫຍັງ
ສາຂານີ້ຮຽນກ່ຽວກັບຊີວະສາດພື້ນຖານ ເຊັ່ນ: ສ່ວນປະກອບໂຄງສ້າງ ແລະ
ໜ້າທີ່ຂອງໂປຣຕິນ, ຄາໂບໄຮເດຣດ ແລະ ເອັນໄຊ.
ນອກຈາກນັ້ນ, ນັກສຶກສາຍັງຈະໄດ້ຮຽນຮູ້ຫຼັກການສິດສອນ, ການວິເຄາະຫຼັກສູດເພື່ອໃຫ້ສາມາດແຕ່ງບົດສອນ ແລະ
ກະກຽມບົດສອບເສັງໃຫ້ກົງກັບຫຼັກສູດໄດ້. ນັກສຶກສາຍັງຈະໄດ້ຮຽນຮູ້
ຫລັກຈັນຍາບັນຂອງການເປັນຄູສອນ, ການສ້າງແຮງບັນດານໃຈ ແລະ
ການຊຸກຍູ້ສົ່ງເສີມໃຫ້ນັກຮຽນມີສ່ວນຮ່ວມໃນຫ້ອງຮຽນ.
ວິທີການສິດສອນ
ວິທີການສິດສອນແມ່ນມີ 2 ແບບຄື: ທິດສະດີ ແລະ
ປະຕິບັດຕົວຈິງ ໂດຍຈະເນັ້ນໃສ່ການທົດລອງຕົວຈິງ ເຊີ່ງເນື້ອໃນການທົດລອງລວມມີ ການສັງເກດ
ແລະ ສຶກສາເບິ່ງສັດເອກຈຸລັງ ແລະ ໂຄງປະກອບສ້າງຂອງພືດດ້ວຍກ້ອງຈຸລະທັດ, ກາຍະວິພາກສາດ ແລະ ການຜ່າຕັດສັດເພື່ອສັງເກດສະລີລະສາດ.
ນັກສຶກສາຍັງຈະໄດ້ລົງພາກສະໜາມເພື່ອເກັບຕົວຢ່າງໃນລະບົບນິເວດ ແລະ
ລວບລວມພືດເພື່ອເປັນຕົວຢ່າງໄວ້ໃນສວນພືດ ແລະ ລົງຝຶກຫັດການສອນຕົວຈິງຢູ່ຕາມໂຮງຮຽນມັດທະຍົມຕ່າງໆ.
ທັກສະ/ຄວາມສົນໃຈ
ນັກຮຽນຄວນມີພື້ນຖານວິຊາຄິດໄລ່ ແລະ ວິຊາທີ່ນອນໃນສາຍທຳມະຊາດ.
ເປັນຄົນມັກຮັກໃນການສິດສອນ ແລະ ມີອັດທະຍາໄສດີ. ມີຄວາມສົນໃຈກ່ຽວກັບສັດ ແລະ ພືດ, ການຈະເລີນເຕີບໂຕຂອງຕົວອ່ອນ, ຮູບຮ່າງໂຄງສ້າງຂອງສິ່ງທີ່ມີຊີວິດ ເຊັ່ນ:
ໂຄງສ້າງຂອງສັດ, ພືດ ແລະ ຈຳພວກແມງໄມ້ຕ່າງໆ, ການເກີດ ແລະ ສືບເຊື້ອຂອງບັກເຕເຣຍ ແລະ
ເຊື້ອພະຍາດຕ່າງໆ.
ຈົບແລ້ວສາມາດ
ນັກສຶກສາທີ່ຈົບຈາກສາຂາວິຊານີ້ຈະມີຄວາມຮູ້ເລິກເຊິ່ງກ່ຽວກັບວິຊາຊີວະສາດ ແລະ
ທັກສະໃນການສິດສອນ ແລະ ການຖ່າຍທອດບົດຮຽນ. ນັກສຶກສາຈະມີທັກສະໃນການສັງເກດ ແລະ
ການຈຳແນກປະເພດສັດ ແລະ ພືດ. ນອກຈາກນັ້ນ,
ຍັງສາມາດວາງແຜນ, ແຕ່ງ ແລະ ອອກແບບບົດສອນ ແລະ ບົດສອບເສັງນຳອີກ.
ອາຊີບ
ນັກສຶກສາທີ່ຈົບຈາກສາຂາວິຊານີ້
ສາມາດປະກອບອາຊີບເປັນອາຈານສອນວິຊາຊີວະສາດສາຂາຕ່າງໆ ຢູ່ຕາມໂຮງຮຽນມັດທະຍົມ.
ນອກຈາກນັ້ນ ຍັງສາມາດເຮັດວຽກໃນສາຂາຕ່າງໆທີ່ກ່ຽວຂ້ອງ ເຊັ່ນ: ການກະເສດ, ປ່າໄມ້,
ສິ່ງແວດລ້ອມ, ການແພດຂັ້ນພື້ນຖານ, ການປູກຝັງ – ລ້ຽງສັດ ແລະ
ການເຮັດຝຸ່ນຊີວະພາບ.
ທີ່ຕັ້ງ ແລະ ຕິດຕໍ່
ຄະນະສຶກສາສາດ
ວິທະຍາເຂດດົງໂດກ, ມະຫາວິທະຍາໄລແຫ່ງຊາດລາວ
ບ້ານ ດົງໂດກ, ເມືອງ ໄຊທານີ, ນະຄອນຫຼວງວຽງຈັນ
ໂທ: 021 770473
ບໍລິການແລ່ນເອກະສານຕ່າງໆ ໃນ ສປປ.ລາວ 
