ສາຂາ ເສດຖະສາດນຳໃຊ້ ຄະນະເສດຖະສາດ ແລະ ບໍລິຫານທຸລະກິດ ມະຫາວິທະຍາໄລແຫ່ງຊາດລາວ
ເສດຖະສາດນຳໃຊ້
ຫຼັກສູດ: ປະລິນຍາຕຼີ 4 ປີ
ຄະນະເສດຖະສາດ ແລະ ບໍລິຫານທຸລະກິດ
ມະຫາວິທະຍາໄລແຫ່ງຊາດລາວ
ນິຍາມ ແລະ ຄວາມສຳຄັນ
ເສດຖະສາດນໍາໃຊ້ ໝາຍເຖິງການນໍາໃຊ້ທິດສະດີ ແລະ
ເຄື່ອງມືທາງດ້ານເສດຖະສາດທີ່ຫຼາກຫຼາຍເຂົ້າໃນການວິເຄາະສະພາບການ ແລະ
ບັນຫາທາງດ້ານເສດຖະກິດ ເຊິ່ງຜົນຂອງການວິເຄາະເສດຖະກິດດ້ວຍເຄື່ອງມືທາງເສດຖະສາດດັ່ງກ່າວ
ຈະໄດ້ຖືກນໍາໃຊ້ໂດຍ ລັດຖະບານ ແລະ ນັກວາງນະໂຍບາຍ, ດັ່ງນັ້ນສາຂານີ້ຈຶ່ງມີຄວາມສໍາຄັນໃນການເປັນພື້້ນຖານໃຫ້ແກ່ການຕັດສິນໃຈເລືອກແນວທາງນະໂຍບາຍ
ແລະ ວາງແຜນພັດທະນາເສດຖະກິດ ໃຫ້ແທດເໝາະ ແລະ ເກີດປະສິດທິພາບສູງສຸດ.
ວິຊານີ້ຮຽນກ່ຽວກັບຫຍັງ
ສາຂານີ້ຮຽນລົງເລິກກ່ຽວກັບທິດສະດີ ແລະ ເຄື່ອງມືທາງເສດຖະສາດ
ໂດຍເນັ້ນໜັກໃສ່ການຄິດໄລ່ແບບຈຳລອງການວິເຄາະ[1] ທາງເສດຖະສາດຕ່າງ ເຊັ່ນ: ເຄື່ອງມືເສດຖະມິຕິ[2], ແບບຈໍາລອງການວິເຄາະການຜະລິດ ແລະ ລາຄາ, ວິເຄາະຕົ້ນທຶນ ແລະ ຜົນຕອບແທນ ແລະ ການວັດປະສິດທິພາບ
ເປັນຕົ້ນ. ພ້ອມທັງ ຈະໄດ້ສຶກສາວິທີການນໍາໃຊ້ທິດສະດີ ແລະ
ເຄື່ອງມືເຫຼົ່ານັ້ນເຂົ້າໃນການວິເຄາະຜົນກະທົບຈາກນະໂຍບາຍ ແລະ ໂຄງການ ຂອງພາກລັດ ແລະ
ເອກະຊົນ ອີກທັງ ບັນຫາເສດຖະກິດອື່ນໆ.
[1]ແບບຈໍາລອງການວິເຄາະທາງເສດຖະສາດ
ເປັນການສະແດງການພົວພັນຂອງຕົວປ່ຽນທາງດ້ານເສດຖະກິດ ໂດຍລັກສະນະທີ່ສະແດງອອກນັ້ນອາດຈະຢູ່ໃນຮູບຂອງສົມຜົນທາງຄະນິດສາດ, ເສັ້ນກຣາຟ ຫຼື ແຜນຜັງ (ຂໍ້ມູນຈາກ: www.th.wikipedia.org)
[2]ເສດຖະມິຕິ ໝາຍເຖິງການວິເຄາະທາງປະລິມານກ່ຽວກັບປະກົດການ ຫຼື
ພຶດຕິກໍາທາງເສດຖະສາດ ໂດຍອາໄສທິດສະດີ ແລະ ຂໍ້ມູນທີ່ສັງເກດໄດ້
ແລ້ວນໍາມາອະທິບາຍການພົວພັນໂດຍວິທີວິນິດໄສທີ່ເໝາະສົມ (ຂໍ້ມູນຈາກ:
ເອກະສານປະກອບການສອນ ວິຊາ Econometrics I, ພາກວິຊາເສດຖະສາດ, ມະຫາວິທະຍາໄລ ກະເສດສາດ)
ວິທີການສິດສອນ
ວິທີການສິດສອນຂອງສາຂານີ້ ແມ່ນໄດ້ເນັ້ນໃສ່ການສອນທິດສະດີ ແລະ
ການປະຕິບັດຕົວຈິງຄວບຄູ່ກັນ. ມີການຍົກຕົວຢ່າງທີ່ເກີດຂຶ້ນຈິງທັງພາຍໃນ ແລະ
ຕ່າງປະເທດເພື່ອເປັນກໍລະນີສຶກສາ, ມີການທັດສະນະສຶກສາເພື່ອເສີມສ້າງຄວາມຮູ້ຈາກພາກທິດສະດີ
ເຂົ້າສູ່ພາກປະຕິບັດຕົວຈິງ. ນອກຈາກນີ້ ນັກສຶກສາຈະໄດ້ລົງຝຶກງານທີ່ ບັນດາກະຊວງ, ໜ່ວຍງານ ແລະ ອົງກອນທີ່ກ່ຽວຂ້ອງກັບການພັດທະນາເສດຖະກິດ.
ທັກສະ/ຄວາມສົນໃຈ
ພື້ນຖານ ທາງດ້ານຄະນິດສາດ, ສະຖິຕິ ແລະ ຄອມພິວເຕີ. ມີທັກສະ ໃນການວິເຄາະ, ການຄໍານວນ ແລະ ການໃຊ້ເຫດ ແລະ ຜົນ. ມີຄວາມຄວາມສົນໃຈ ກ່ຽວກັບການວິໄຈ ແລະ
ສຶກສາຄົ້ນຄວ້າກ່ຽວກັບປະເດັນເສດຖະກິດ-ສັງຄົມ, ສຶກສາກ່ຽວກັບໂຄງການທັງພາກລັດ ແລະ ເອກະຊົນ ແລະ ມີຄວາມສົນໃຈໃນການເຮັດວຽກໃນໂຄງການພັດທະນາເສດຖະກິດ-ສັງຄົມ.
ຈົບແລ້ວສາມາດ
ສາມາດເຂົ້າໃຈ ແລະ ນໍາໃຊ້ທິດສະດີກ່ຽວກັບເສດຖະສາດ
ເຂົ້າໃນການອະທິບາຍສະພາບຕົວຈິງຂອງການພັດທະນາເສດຖະ ກິດ ແລະ ສັງຄົມ, ນໍາໃຊ້ແບບຈໍາລອງ ແລະ
ເຄື່ອງມືທາງເສດຖະສາດອື່ນໆເຂົ້າໃນການວິເຄາະ ແລະ ປະເມີນຜົນກະທົບຂອງການນໍາໃຊ້ນະໂຍບາຍເສດຖະກິດ
ແລະ ສາມາດນໍາໃຊ້ໂປຣແກຣມຄອມພິວເຕີທາງດ້ານເສດຖະສາດເຂົ້າໃນການວິເຄາະ.
ອາຊີບ
ນັກສຶກສາທີ່ຈົບຈາກສາຂານີ້ສາມາດປະກອບອາຊີບເປັນນັກຄົ້ນຄວ້າ, ທີ່ປຶກສາ, ພະນັກງານວິເຄາະ
ແລະ ປະເມີນໂຄງການພັດທະນາຂອງພາກລັດ ແລະ ພາກເອກະຊົນ. ໂດຍສາມາດເຮັດວຽກໃນອົງກອນຕ່າງໆ
ເຊັ່ນ: ກະຊວງການເງິນ, ກະຊວງອຸດສະຫະກໍາ
ແລະ ການຄ້າ, ອົງການສະຫະປະຊາຊາດເພື່ອການພັດທະນາ, ທະນາຄານໂລກ, ທະນາຄານພັດທະນາອາຊີ.
ທີ່ຕັ້ງ ແລະ ຕິດຕໍ່
ຄະນະ ເສດຖະສາດ ແລະ ບໍລິຫານທຸລະກິດ
ວິທະຍາເຂດດົງໂດກ, ມະຫາວິທະຍາໄລແຫ່ງຊາດລາວ
ບ້ານ ດົງໂດກ, ເມືອງ ໄຊທານີ, ນະຄອນຫຼວງວຽງຈັນ.
ໂທ: 021
770067. ເວັບໄຊ໌ www.febm-nuol.org
ບໍລິການແລ່ນເອກະສານຕ່າງໆ ໃນ ສປປ.ລາວ 
