ສາຂາ ພາສາຈີນ ຄະນະອັກສອນສາດ ມະຫາວິທະຍາໄລແຫ່ງຊາດລາວ
ພາສາຈີນ
ຫຼັກສູດ: ປະລິນຍາຕີ 4 ປີ
ຄະນະອັກສອນສາດ
ມະຫາວິທະຍາໄລແຫ່ງຊາດລາວ
ນິຍາມ
ແລະ ຄວາມສຳຄັນ
ພາສາຈີນ ແມ່ນພາສາໜຶ່ງທີ່ຖືກນໍາໃຊ້ຢ່າງກວ້າງຂວາງໃນປະເທດລາວ
ໃນການຕິດຕໍ່ສື່ສານ, ພົວພັນວຽກງານ ແລະ
ເສີມຂະຫຍາຍການຮ່ວມມື ລາວ-ຈີນ ໃນຫຼາຍໆດ້ານ ເຊັ່ນ: ດ້ານການສຶກສາ, ທ່ອງທ່ຽວ,
ເສດຖະກິດ
ແລະ ການຄ້າ. ດັ່ງນັ້ນ, ການຮຽນພາສາຈີນ
ຈຶ່ງມີຄວາມສໍາຄັນຫຼາຍຕໍ່ການພັດທະນາເສດຖະກິດ-ສັງຄົມ ແລະ ວັດທະນະທໍາຂອງປະເທດເຮົາ
ໂດຍສະເພາະໃນປັດຈຸບັນ ການລົງທຶນຈາກປະເທດຈີນມີທ່າອ່ຽງນັບມື້ນັບສູງຂື້ນ.
ວິຊານີ້ຮຽນກ່ຽວກັບຫຍັງ
ວິຊານີ້ຮຽນກ່ຽວກັບພາສາຈີນກາງ ນັບແຕ່ຂັ້ນພື້ນຖານ ເຊັ່ນ: ການຂຽນ, ການອ່ານ,
ໄວຍະກອນ, ການໃຊ້ຄໍາ ແລະ ໂຄງສ້າງປະໂຫຍກ
ໄປຈົນເຖິງການຕິດຕໍ່ສື່ສານສະເພາະດ້ານ ເຊັ່ນ: ໃນຂົງເຂດລັດຖະການ, ທຸລະກິດ,
ທ່ອງທ່ຽວ-ໂຮງແຮມ
ເປັນຕົ້ນ. ນອກນີ້, ນັກສຶກສາຍັງຈະໄດ້ຮຽນຮູ້ກ່ຽວກັບ
ເສດຖະກິດ, ວັດທະນະທໍາ, ປະຫວັດສາດ,
ການຄ້າ, ການທ່ອງທ່ຽວ ແລະ ລະບົບການເມືອງ-ການປົກຄອງ
ຂອງປະເທດຈີນ ພ້ອມທັງ ທິດສະດີໃນການແປ ອີກດ້ວຍ.
ວິທີການສິດສອນ
ການສິດສອນແມ່ນອີງໃສ່ພາກທິດສະດີ ແລະ ປະຕິບັດຕົວຈິງຄ່ຽງຄູ່ກັນໄປ.
ໃນນັ້ນ ນັກສຶກສາຈະໄດ້ຮຽນທັກສະໃນການຟັງ,
ອ່ານ, ເວົ້າ ແລະ ຂຽນ (ຂຽນບົດຂ່າວ, ໃບສະເໜີທາງລັດຖະການ ແລະ
ບົດນິພົນທາງດ້ານວິທະຍາສາດ-ວິທະຍາການຂະ
ແໜງຕ່າງໆ).
ນອກນີ້, ຍັງຈະໄດ້ລົງຝຶກງານກັບອົງກອນທີ່ກ່ຽວຂ້ອງ; ໄດ້ຮຽນ ແລະ ສົນທະນາກັບເຈົ້າຂອງພາສາ; ແລະ ເຂົ້າຮ່ວມກິດຈະກຳຕ່າງໆ ເຊັ່ນ:
ການສະແດງວັດທະນະທໍາຈີນ ເປັນຕົ້ນ.
ທັກສະ/ຄວາມສົນໃຈ
ມີຄວາມຮູ້ພື້ນຖານ ທາງດ້ານພາສາອັງກິດ
ເຊິ່ງຈະໄດ້ນໍາໃຊ້ເຂົ້າໃນການຮຽນພາສາຈີນ ກໍ່ຄືການອ່ານຕົວອອກສຽງພາສາຈີນ (ພິ່ງອີ່ນ). ເປັນຄົນ ມີຄວາມດຸໝັ່ນໃນການຮຽນ, ຂຽນ ແລະ ອ່ານ. ມີຄວາມສົນໃຈ ໃນພາສາຈີນ ແລະ ມີໃຈມັກຮັກໃນການຮຽນຮູ້ສີ່ງໃໝ່ໆ
ເຊັ່ນ: ມັກໃນວັດທະນະທຳ ແລະ ຊີວິດການເປັນຢູ່ຂອງຄົນຈີນ.
ຈົບແລ້ວສາມາດ
ມີຄວາມຊໍານານໃນການນຳໃຊ້ພາສາຈີນ ໂດຍສະເພາະແມ່ນທັກສະພື້ນຖານທັງ 4 ດ້ານ ກໍ່ຄື ການອ່ານ,
ການຟັງ, ການຂຽນ ແລະ ການເວົ້າ.
ມີທັກສະໃນການນໍາໃຊ້ພາສາຈີນເຂົ້າໃນວຽກງານສະເພາະດ້ານ ເຊັ່ນ: ໃນການຕິດຕໍ່ທຸລະກິດ, ການທ່ອງທ່ຽວ,
ການຕ້ອນຮັບແຂກ
ແລະ ການບໍລິຫານວຽກງານໃນໂຮງແຮມ ເປັນຕົ້ນ.
ອາຊີບ
ສາມາດປະກອບອາຊີບເຂົ້າໃນຫຼາຍຂະແໜງວຽກງານ ເຊັ່ນ: ເປັນນັກແປພາສາ, ອາຈານສອນພາສາຈີນ,
ຜູ້ປະສານງານໃນວຽກງານວັດທະນະທໍາ-ສັງຄົມ, ເສດຖະກິດ ແລະ ການຄ້າ.
ສາມາດເຮັດວຽກຕາມດ່ານກວດຄົນເຂົ້າເມືອງ ໂດຍສະເພາະດ່ານທາງພາກເໜືອ, ເປັນຜູ້ປະກອບການ ຫຼື ເຮັດວຽກຕາມບໍລິສັດຕ່າງໆຂອງຈີນ
ເປັນຕົ້ນ.
ທີ່ຕັ້ງ ແລະ ຕິດຕໍ່
ຄະນະອັກສອນສາດ
ວິທະຍາເຂດດົງໂດກ, ມະຫາວິທະຍາໄລແຫ່ງຊາດລາວ
ບ້ານ ດົງໂດກ, ເມືອງ ໄຊທານີ, ນະຄອນຫຼວງວຽງຈັນ
ໂທ: 021 740276 ຫຼື 021 740277
ເວັບໄຊ໌ www.fol.edu.la
ແຫຼ່ງຂໍ້ມູນ: https://collegemajor.la/
ບໍລິການແລ່ນເອກະສານຕ່າງໆ ໃນ ສປປ.ລາວ 
