ສາຂາ ການກວດສອບ ຄະນະເສດຖະສາດ ແລະ ບໍລິຫານທຸລະກິດ ມະຫາວິທະຍາ​ໄລ​ແຫ່ງ​ຊາດລາວ

ການກວດສອບ

ຫຼັກສູດ: ປະລິນຍາ​ຕີ 4 ປີ

ຄະນະເສດຖະສາດ ແລະ ບໍລິຫານທຸລະກິດ

ມະຫາວິທະຍາ​ໄລ​ແຫ່ງ​ຊາດລາວ

ນິຍາມ ແລະ ຄວາມສຳຄັນ

ການກວດ​ສອບ​ ໝາຍ​ເຖິງຂະ​ບວນການ​ຮວບ​ຮວມຂໍ້​ມູນ, ການ​ປ​ະ​ເມີນຫຼັກ​​ຖານ​​ ​ແລະ ການອອກ​ຄໍາຄິດ​ເຫັນ​​ໃຫ້​​ແກ່​ອົງ​ກອນ​ໃດ​ໜຶ່ງໃຫ້​ສອດ​ຄ່ອງ​ກັບ​ກົ​ດລະບຽບ ​ໂດຍ​ສະ​ເພາະ​​​ແມ່ນ​ກົ​ດໝາຍ​ບັນຊີ ​ແລະ ອາກອນ​ ​ເພື່ອ​ສ້າງ​ປະສິດ​ທິພາບ​ໃນ​ການ​ດຳ​ເນີນ​ງານ ​ແລະ ​ເພື່ອ​ຫຼຸດ​​​ຜ່ອນ​ການ​ສໍ້​ລາດ​ບັງຫຼວງ. ສາຂາ​ນີ້​ມີ​ຄວາ​ມສຳຄັນ​ຍ້ອນ​ວ່າ​​ເປັນສາ​ຂາ​ຫຼັກ​ທີ່​ຈະ​ຮອງ​ຮັບ​ການ​ຂະຫຍາ​ຍຕົວ​ຂອງ​ເສ​ດຖະກິດ ​ແລະ ​ເປັນ​ສາຂາ​ທີ່ຊ່ວຍ​ຢັ້ງຢືນ​ໃຫ້​ອົງ​ກອນ​ຕ່າງໆ​ມີ​ຄວາມ​ຊື່​ສັດ​ສຸ​ຈະລິດ ​ແລະ ​ໄດ້ມາ​ດຕະ​ຖານ​ສາກົນ.

ວິຊານີ້ຮຽນກ່ຽວກັບຫຍັງ

ສາຂາວິຊານີ້ສຶກສາຄົ້ນຄວ້າກ່ຽວກັບການກວດສອບ ເຊິ່ງລວມມີ ການກວດສອບບັນຊີ, ການກວດສອບການເງິນ, ການກວດສອບພາສີອາກອນ, ການກວດສອບໂຄງການ ແລະ ການກວດສອບພາກລັດ ໂດຍ​ນຳ​ໃຊ້ມາດ​ຕະ​ຖານ​ການກວດ​ສອບ​ທີ່​​ຖືກ​ຕ້ອງ ​ແລະ ສອດ​ຄ່ອງ​ກັບ​ຂໍ້​ກຳນົດ  ​ແລະ ກົດໝາຍ. ນອກນີ້, ຍັງມີວິຊາປິ່ນອ້ອມອື່ນໆ ເຊັ່ນ: ບັນຊີ, ການປະເມິີນໂຄງການ, ການ​ຄວບ​ຄຸມ​ພາຍ​ໃນ​, ການ​ບໍລິຫານ​ຄວາມ​ສ່ຽງ​ທາງ​ດ້ານ​ການ​ເງິນ ​ແລະ ກາ​ນດຳ​ເນີນ​ງານຂອງ​ອົງ​ກອນ ເປັນຕົ້ນ.

ວິທີການສິດສອນ

ວິທີການສິດສອນຂອງສາຂາວິຊານີ້ ​ປະກອບ​​ມີການຮຽນກ່ຽວກັບທິດ​ສະ​ດີ​ ໂດຍຜ່ານການບັນ​​ຍາຍ ແລະ ການປະຕິບັດ​ຕົວ​ຈິງ ​ເຊິ່ງຈະມີການນໍາໃຊ້ໃບລາຍງານການກວດສອບ ແລະ ຜົນການກວດສອບຕົວຈິງທີ່ຜ່ານມາ ເພື່ອປະກອບການສອນ ໂດຍໃຫ້ນັກສຶກສາສັງເກດ ແລະ ຝຶກການເຮັດ​ບົດ​ລາຍ​ງານ​ການກວດ​ສອບ. ນອກນີ້, ຍັງມີການລົງ​ຝຶກ​ງານ​ໃນ​ອົງການ​ຈັດ​ຕັ້ງ​ຕ່າງໆ ເຊັ່ນ: ກົມກວດກາ, ອົງການກວດສອບແຫ່ງລັດ, ທະນາຄານກາງ ແລະ ບໍລິສັດກວດສອບເອກະຊົນຕ່າງໆ.

ທັກສະ/ຄວາມສົນໃຈ

ຄວາມຮູ້ພື້ນຖານ ​ທາງດ້ານ​​ຄະນິດສາດ, ສະຖິຕິ ແລະ ວິຊາສັງຄົມສາດ. ເປັນຄົນມັກສັງເກດ, ມັກຕັ້ງຂໍ້ສົງໃສ. ມີ​ຄວາມ​ສາມາດ​ໃນ​ການສອບ​ຖາມ ​ແລະ ​​​ແກ້​​ໄຂບັນຫາ​ສະ​ເພາະ​ໜ້າ​ໄດ້ດີ ແລະ ທີ່​ສຳຄັນ​ຕ້ອງ​ມີ​ຄວາມ​ລະອຽດ, ມັກ​ໃນ​ການ​ເບິ່ງ​ພາບ​ລວມຂອງ​ບັນຫາ, ມັກການວິ​​ເຄາະ​ຂໍ້​ມູນ ​ແລະ ມັກ​ໃນ​ການ​ປະ​ຕິ​ບັດ​ຕາມ​ກົດ​ລະ​ບຽບ.

ຈົບແລ້ວສາມາດ

ຫຼັງຈາກຈົບການສຶກສາ, ນັກ​ສຶກສາ​​​ຈະ​ມີ​ຄວ​າມເຂົ້າໃຈກ່ຽວກັບທິດສະດີການກວດສອບ. ມີທັກສະພື້ນຖານໃນ​ການກວດ​ສອບ​ໂດຍ​ນຳ​​ໃຊ້​ມາດ​ຕະຖານ​ການກວດ​ສອບ​ສາກົນ, ຮູ້ເບິ່ງປຶ້ມບັນຊີທີ່ບໍລິສັດລົງໄວ້ເພື່ອທຽບກັບໃບບິນ, ຮູ້ຈັກວິເຄາະລະບົບຄວບຄຸມພາຍໃນບໍລິສັດ, ມີ​ຄວາມ​ຮູ້​ໃນ​ການ​ບໍລິຫານ​ຄວາມ​ສ່ຽງ, ຄວາມ​ຮູ້ທາງ​ດ້ານ​ບັນຊີ ​ແລະ ກົດໝາຍ​ອາ​ກອນ.

ອາຊີບ

ນັກສຶກສາທີ່​ຈົບ​ຈາກ​ສາຂາ​​ນີ້​ ​ສາມາດ​ປະກອບອາຊີບໃນວຽກງານກວດ​ສອບ ເຊັ່ນ: ເປັນຜູ້ຊ່ວຍກວດສອບ ແລະ ຜູ້ກວດສອບ ທັງ​ພາກ​ລັດ ​ແລະ ​ເອກະ​ຊົນ, ທັງ​ພາຍ​ໃນ ​ແລະ ຕ່າງປະ​ເທດ. ນອກ​ຈາກ​ນັ້້ນ ຍັງສາມາດເຮັດວຽກອື່ນໆທີ່ກ່ຽວຂ້ອງກັບສາຂາບັນຊີ ແລະ ພາສີອາກອນ ເຊັ່ນ: ​ເປັນທີ່​ປຶກສາ ທາງ​ດ້ານ​ບັນຊີ​ ​ແລະ ນັກກວດ​ສອບ​ອິດສະຫຼະ​ ເປັນຕົ້ນ.

ທີ່ຕັ້ງ ແລະ ຕິດຕໍ່

ຄະນະເສດຖະສາດ ແລະ ບໍລິຫານທຸລະກິດ

ວິທະຍາເຂດດົງໂດກ ມະຫາວິທະຍາໄລແຫ່ງຊາດລາວ

ບ້ານ ດົງໂດກ, ເມືອງ ໄຊທານີ, ນະຄອນຫຼວງວຽງຈັນ.

ໂທ: 021 77006

ເວັບໄຊ໌ www.febm-nuol.org

ແຫຼ່ງຂໍ້ມູນ: https://collegemajor.la/