ສາຂາ ສື່ສານມວນຊົນ ຄະນະອັກສອນສາດ ມະຫາວິທະຍາໄລແຫ່ງຊາດລາວ
ສື່ສານມວນຊົນ
ຫຼັກສູດ: ປະລິນຍາຕີ 4 ປີ
ຄະນະອັກສອນສາດ
ມະຫາວິທະຍາໄລແຫ່ງຊາດລາວ
ນິຍາມ ແລະ ຄວາມສຳຄັນ
ສື່ສານມວນຊົນ
ໝາຍເຖິງການນໍາໃຊ້ສື່ຕ່າງໆ ເພື່ອເປັນເຄື່ອງມືໃນການຕິດຕໍ່ສື່ສານ, ເຜີຍແຜ່ຂໍ້ມູນຄວາມຮູ້ທີ່ສຳຄັນ ແລະ
ສາລະໜ້າຮູ້ທີ່ເປັນປະໂຫຍດໃຫ້ແກ່ສັງຄົມ ໂດຍຜ່ານຊ່ອງທາງຕ່າງໆ ເຊັ່ນ: ໜັງສືພິມ, ວາລະສານ,
ໂທລະພາບ
ຫຼື ວິທະຍຸເປັນຕົ້ນ. ສື່ສານມວນຊົນມີບົດບາດສຳຄັນຫຼາຍ ໃນການກະຈາຍຂໍ້ມູນ, ແລກປ່ຽນຂ່າວສານເຊິ່ງກັນ ແລະ
ກັນອັນກໍ່ໃຫ້ເກີດມີການເຄື່ອນໄຫວ ແລະ
ຮັບຮູ້ຂ່າວສານບ້ານເມືອງພາຍໃນສັງຄົມປັດຈຸບັນ.
ວິຊານີ້ຮຽນກ່ຽວກັບຫຍັງ
ສາຂາວິຊານີ້ຮຽນກ່ຽວກັບບັນດາວິທີການເຜີຍແຜ່ຂໍ້ມູນຂ່າວສານຕ່າງໆ
ເຊັ່ນ: ການຂຽນຂ່າວໃນໜັງສືພີມ ຫຼື ການຂຽນບົດຄວາມໃນວາລະສານຕ່າງໆ, ຫຼັກການລາຍງານຂ່າວ, ການຈັດທຳຂ່າວ, ການຖ່າຍທຳ ແລະ
ການຕັດຕໍ່ພາບ. ນອກຈາກນັ້ນ ຍັງຮຽນຮູ້ກ່ຽວກັບສິລະປະການເວົ້າ, ການເປັນໂຄສົກວິທະຍຸກະຈາຍສຽງ ແລະ ໂທລະພາບ
ພ້ອມທັງສຶກສາກ່ຽວກັບຄຸນສົມບັດ ແລະ ຈັນຍາບັນຂອງສື່ມວນຊົນກໍຄືນັກຂ່າວ
ແລະ ນັກໜັງສືພິມເປັນຕົ້ນ.
ວິທີການສິດສອນ
ວິທີການສິດສອນແມ່ນອີງໃສ່ທັງພາກທິດສະດີ
ແລະພາກປະຕິບັດຕົວຈິງໄປຄຽງຄູ່ກັນ ເຊັ່ນ: ການທົດລອງການເປັນໂຄສົກ, ການນຳໃຊ້ຫ້ອງອັດສຽງ-ຟັງສຽງ ເປັນຕົ້ນ.
ນອກນັ້ນ, ນັກສຶກສາຍັງຈະມີໂອກາດເຂົ້າຮ່ວມໃນກິດຈະກຳທີ່ໂຮງຮຽນຈັດຕັ້ງຂຶ້ນ
ເຊັ່ນ: ການຂຽນຂ່າວຕິດກະດານຂ່າວສານ,
ການຖ່າຍທຳພິທີການພາຍໃນໂຮງຮຽນ
ພ້ອມທັງມີການລົງຝຶກງານໃນສະຖານີໂທລະພາບ ແລະ
ສະຖານີວິທະຍຸກະຈາຍສຽງແຫ່ງຊາດ ເປັນຕົ້ນ.
ທັກສະ/ຄວາມສົນໃຈ
ຄວາມຮູ້ພື້ນຖານທາງດ້ານພາສາລາວ ແລະ
ພາສາຕ່າງປະເທດ. ມີຄວາມມັກຮັກ ໃນການຂຽນຂ່າວປະເພດຕ່າງໆ. ເປັນຄົນມີມະນຸດສຳພັນດີ, ມີຄວາມສາມາດໃນການວາງແຜນ ແລະ ວິເຄາະສະຖານະການ, ມີຄວາມຮູ້ດ້ານການນໍາໃຊ້ອຸປະກອນໄອທີຕ່າງໆ, ມີຄວາມຊື່ສັດສຸຈະລິດ ແລະ
ຍຸດຕິທຳໃນການເຜີຍແຜ່ຂໍ້ມູນ. ທີ່ສໍາຄັນ ແມ່ນຕ້ອງມີທັກສະໃນການນໍາສະເໜີຂໍ້ມູນ.
ຈົບແລ້ວສາມາດ
ມີຄວາມຮູ້ດ້ານພາສາຕ່າງປະເທດ, ມີຄວາມສາມາດໃນການນຳໃຊ້ສຳນວນພາສາລາວ ຫຼື
ພາສາຕ່າງປະເທດ ເຊັ່ນ: ການໃຊ້ຄໍາສັບທາງລັດຖະການທີ່ຖືກຕ້ອງ ເປັນຕົ້ນ.
ມີຄວາມຮູ້ດ້ານໄອທີ ແລະ ການນໍາໃຊ້ຄອມພີວເຕີ ເຂົ້າໃນການສ້າງສື່ຕ່າງໆ ເຊັ່ນ:
ການຕັດຕໍ່ຮູບພາບ, ການຖ່າຍພາບ ແລະ
ຖ່າຍວິດີໂອ. ມີທັກສະ ແລະ ສິລະປະໃນການເວົ້າທີ່ດຶງດູດໃຈຜູ້ອື່ນ.
ອາຊີບ
ສາມາດປະກອບອາຊີບໃນທຸກຂະແໜງການທີ່ກ່ຽວຂ້ອງກັບການສື່ສານ
ເຊັ່ນ: ເປັນໂຄສົກ, ນັກຂ່າວໂທລະພາບ ແລະ
ວິທະຍຸ, ນັກຂ່າວໜັງສືພິມ, ນັກຂຽນວາລະສານ,
ເປັນບັນນາທິການ
ຫຼື ຜູ້ຖ່າຍທຳພາບໃນອົງກອນຕ່າງໆ ເຊັ່ນ: ໂທລະພາບແຫ່ງຊາດລາວ ແລະ ບັນດາຫົວໜວ່ຍທຸລະກິດໂທລະພາບ, ວິທະຍຸກະຈາຍສຽງ, ເປັນໂຄສົກໃນກອງປະຊຸມ ແລະ ງານສັງສັນຕ່າງໆ.
ທີ່ຕັ້ງ ແລະ ຕິດຕໍ່
ຄະນະອັກສອນສາດ
ວິທະຍາເຂດດົງໂດກ, ມະຫາວິທະຍາໄລແຫ່ງຊາດລາວ
ບ້ານ ດົງໂດກ, ເມືອງ ໄຊທານີ,
ນະຄອນຫຼວງວຽງຈັນ
ໂທ: 021 740276 ຫຼື 021 740277
ເວັບໄຊ໌ www.fol.edu.la
ບໍລິການແລ່ນເອກະສານຕ່າງໆ ໃນ ສປປ.ລາວ 
