ສາຂາ ການຕະຫຼາດ ຄະນະເສດຖະສາດ ແລະ ບໍລິຫານທຸລະກິດ ມະຫາວິທະຍາໄລແຫ່ງຊາດລາວ
ການຕະຫຼາດ
ຫຼັກສູດ: ປະລິນຍາຕີ 4 ປີ
ຄະນະເສດຖະສາດ ແລະ ບໍລິຫານທຸລະກິດ
ມະຫາວິທະຍາໄລແຫ່ງຊາດລາວ
ນິຍາມ
ແລະ ຄວາມສຳຄັນ
ການຕະຫຼາດໝາຍເຖິງ
ກິດຈະກໍາຕ່າງໆທີ່ມີຈຸດປະສົງເພື່ອກໍ່ໃຫ້ເກີດມີການເຄື່ອນຍ້າຍສິນຄ້າ ຫຼື ການບໍລິການ
ຈາກຜູ້ຜະລິດ ໄປສູ່ຜູ້ບໍລິໂພກ ຫຼື ຜູ້ໃຊ້ບໍລິການ ເພື່ອໃຫ້ເກີດຄວາມພໍໃຈ.ສາຂານີ້ມີຄວາມສໍາຄັນ
ເນື່ອງຈາກໃນປັດຈຸບັນ ມີການແຂ່ງຂັນທາງດ້ານທຸລະກິດຫຼາຍຂຶ້ນ
ຈຶ່ງມີຄວາມຈໍາເປັນໃນການນໍາໃຊ້ເຄື່ອງມືທາງການຕະຫຼາດເຂົ້າໃນການເພີ່ມປະສິດທິພາບໃນການດໍາເນີນທຸລະກິດ
ເພື່ອການຢູ່ລອດຂອງທຸລະກິດ ກໍ່ຄືການຮັກສາລູກຄ້າເກົ່າ, ເພີ່ມລູກຄ້າໃໝ່ ແລະ ຮັກສາສ່ວນຄອງການຕະຫຼາດ.
ວິຊານີ້ຮຽນກ່ຽວກັບຫຍັງ
ສາຂາວິຊານີ້ຮຽນກ່ຽວກັບບັນດາປະເພດຂອງການຕະຫຼາດ, ການບໍລິຫານການຕະຫຼາດ, ນະໂຍບາຍການຕະຫຼາດ ແລະ ບັນດາເຄື່ອງມືທາງດ້ານການຕະຫຼາດ ເຊັ່ນ:
ການໂຄສະນາ, ການປະຊາສຳພັນ, ຍຸດທະສາດດ້ານຜະລິດຕະພັນ ແລະ ລາຄາ (ການພັດທະນາຜະລິດຕະພັນ, ການກໍານົດລາຄາ),
ການບໍລິຫານກາຍີ່ຫໍ້ຜະລິດຕະພັນ
ແລະ ອື່ນໆ. ນອກຈາກນີ້ ຍັງໄດ້ຮຽນກ່ຽວກັບທິິດສະດີ ແລະ ເຄື່ອງມືໃນການວິໄຈທາງການຕະຫຼາດ, ການສຶກສາພຶດຕິກໍາຂອງຜູ້ບໍລິໂພກ ແລະ ອື່ນໆ.
ວິທີການສິດສອນ
ວິທີການສຶກສາແມ່ນປະກອບມີພາກທິດສະດີ ແລະ ພາກປະຕິບັດຕົວຈິງໄປພ້ອມໆກັນເຊັ່ນ:
ການລົງຝຶກງານຕົວຈິງນຳບັນດາອົງກອນ ແລະ ພາກສ່ວນທີ່ກ່ຽວຂ້ອງນຳພາກລັດ
ແລະ ບັນດາບໍລິສັດເອກະຊົນຕ່າງໆ, ການເຮັດບົດລາຍງານທີ່ຕິດພັນກັບການປະຕິບັດຕົວຈິງໃນແຕ່ລະວິຊາ
ແລະ ການສຶກສາຈາກກໍລະນີສຶກສາ. ນອກຈາກນັ້ນ,
ນັກສຶກສາຍັງຈະໄດ້ສ້າງສື່ທາງການຕະຫຼາດ
ໂດຍສະເພາະສື່ໃນການຂາຍ ເຊັ່ນ: ການຂາຍສິນຄ້າທາງເຟສບຸກ ແລະ ເວັບໄຊ ເປັນຕົ້ນ.
ທັກສະ/ຄວາມສົນໃຈ
ຄວາມຮູ້ພື້ນຖານ ທາງດ້ານຄະນິດສາດ, ສະຖິຕິ ແລະ
ການບໍລິຫານ. ເປັນຄົນທີ່ມີຄວາມຄິດສ້າງສັນ ແລະ
ຈິນຕະນາການສູງ, ມີຄວາມກະຕືລືລົ້ນ, ເປັນນັກສັງເກດການ, ສາມາດວິເຄາະ ແລະ ໄຈ້ແຍກບັນຫາໄດ້. ມີຄວາມສົນໃຈທາງດ້ານການໂຄສະນາ, ມັກຮຽນຮູ້ສິ່ງໃໝ່ໆທີ່ເກີດຂຶ້ນຮອບຕົວ ແລະ
ມັກວິເຄາະສະຖານະການເສດຖະກິດສັງຄົມໃນຍຸກປັດຈຸບັນ.
ຈົບແລ້ວສາມາດ
ນັກສຶກສາທີ່ຈົບຈາກສາຂານີ້ຈະມີຄວາມສາມາດໃນການວາງແຜນທາງດ້ານການຕະຫຼາດ, ດໍາເນີນການວິເຄາະ ແລະ ການທົດລອງຕະຫຼາດ, ມີຄວາມສາມາດໃນການສ້າງແຜນການໂຄສະນາ, ສ້າງກາຍີ່ຫໍ້,
ການຫຸ້ມຫໍ່
ທີ່ມີເອກະລັກ ແລະ ຈູງໃຈ. ມີທັກສະໃນການນໍາສະເໜີ ເຊັ່ນ: ການໃຊ້ສື່ນໍາສະເໜີ, ການເວົ້າໃນທາງສ້າງສັນ ແລະ
ບຸກຄະລິກກະພາບໃນການນໍາສະເໜີ.
ອາຊີບ
ນັກສຶກສາທີ່ຮຽນຈົບຈາກສາຂານີ້ສາມາດປະກອບອາຊີບເປັນນັກການຕະຫຼາດ, ທີ່ປຶກສາທາງດ້ານການຕະຫຼາດ ແລະ ນັກໂຄສະນາ
ໃນອົງການຈັດຕັ້ງລັດ ເຊັ່ນ: ກະຊວງອຸດສາຫະກຳ ແລະ ການຄ້າ,ກະຊວງແຜນການ ແລະ ການລົງທຶນ ຫຼື
ບໍລິສັດເອກະຊົນຕ່າງໆ.ເປັນນັກຄົ້ນຄວ້າ ແລະ ວິໄຈດ້ານການຕະຫຼາດ, ເປັນຜູ້ບໍລິຫານ ຫຼື ປະກອບທຸລະກິດຂອງຕົນເອງ.
ທີ່ຕັ້ງ ແລະ ຕິດຕໍ່
ຄະນະເສດຖະສາດ ແລະ ບໍລິຫານທຸລະກິດ
ວິທະຍາເຂດດົງໂດກ ມະຫາວິທະຍາໄລແຫ່ງຊາດລາວ
ບ້ານ ດົງໂດກ, ເມືອງ ໄຊທານີ, ນະຄອນຫຼວງວຽງຈັນ.
ໂທ: 021 77006
ເວັບໄຊ໌ www.febm-nuol.org
ບໍລິການແລ່ນເອກະສານຕ່າງໆ ໃນ ສປປ.ລາວ 
