ສາຂາ ຄະນິດສາດ ຄະນະ ວິທະຍາສາດທຳມະຊາດ ມະຫາວິທະຍາໄລແຫ່ງຊາດລາວ
ຄະນິດສາດ
ຫຼັກສູດ ປະລິນຍາຕີ 4 ປີ
ຄະນະ ວິທະຍາສາດທຳມະຊາດ, ມະຫາວິທະຍາໄລແຫ່ງຊາດລາວ
ນິຍາມ ແລະ ຄວາມສຳຄັນ
ຄະນິດສາດ ໝາຍເຖິງ
ການສຶກສາກ່ຽວກັບວິທີການຕ່າງໆໃນການຄໍານວນ. ວິຊານີ້ ມີຄວາມສຳຄັນເນື່ອງຈາກ
ມັນເປັນເຄື່ອງມື ທີ່ຖືກນໍາໃຊ້ເຂົ້າໃນການພິສູດ, ວິໄຈ ແລະ ແກ້ໄຂບັນຫາ ພ້ອມທັງສາມາດປະຍຸກໃຊ້
ເຂົ້າໃນວຽກງານຕົວຈິງໄດ້ ໃນຫຼາຍໆຂະແໜງການ ບໍ່ວ່າຈະເປັນ ການບັນຊີ, ຄິດໄລ່ສະຖິຕິ, ວາງແຜນເສດຖະສາດ, ຄິດໄລ່ພູມີສາດ, ສຶກສາພົນລະເມືອງ, ອຸດສາຫະກໍາ ແລະ ການວິໄຈທາງດ້ານວິທະຍາສາດຕ່າງໆ.
ວິຊານີ້ຮຽນກ່ຽວກັບຫຍັງ
ສຶກສາກ່ຽວກັບ ຄະນິດສາດທົ່ວໄປເຊັ່ນ: ຜົນຕໍາລາ, ສັງຄະນິດ, ໂລຊິກ ແລະ ເລຂາວິເຄາະ; ສະຖິຕິຄະນິດສາດ; ຄວາມຮູ້ພື້ນຖານກ່ຽວກັບຖານຂໍ້ມູນ; ຄະນິດສາດສໍາລັບເສດຖະສາດ ແລະ ບໍລິຫານທຸລະກິດ; ສຶກສາລົງເລິກກ່ຽວກັບ ສູດຄິດໄລ່ທີ່ຊັບຊ້ອນຂຶ້ນ
ພ້ອມທັງການນຳໃຊ້ຄະນິດສາດເຂົ້າຊ່ວຍໃນຂະແໜງອື່ນໆ ໃນການຄິດໄລ່; ແລະ ຮຽນກ່ຽວກັບ ຊອຟແວຣ໌ທາງຄະນິດສາດເພື່ອຄິດໄລ່, ຂຽນຮູບແບບຕ່າງໆທີ່ກ່ຽວຂ້ອງ ແລະ
ໃຊ້ເຂົ້າໃນການແກ້ບັນຫາ.
ວິທີການສິດສອນ
ອີງໃສ່ຫຼັກສູດ ລວມມີການຮຽນທິດສະດີ ໃນການນຳໃຊ້ຄະນິດສາດ
ເຂົ້າໃນການຄິດໄລ່; ມີການນຳໃຊ້ຄອມພິວເຕີເຂົ້າໃນການຮຽນ; ນໍາໃຊ້ໂປຣແກຣມການຄິດໄລ່ຕົວຈິງ; ມີການແກ້ບົດເຝິກຫັດ; ມີການລົງເກັບກໍາຂໍ້ມູນ; ປະຕິບັດການວິໄຈຂະໜາດນ້ອຍ; ສຶກສາ, ວິເຄາະ
ແລະ ນໍາສະເໜີຫົວຂໍ້ທີ່ສົນໃຈ; ແລະ ມີການລົງຝຶກງານຕາມສະຖານທີ່ຕ່າງໆ ໃນນະຄອນຫຼວງວຽງຈັນ
ແລະ ຕ່າງແຂວງ ເຊັ່ນ: ສູນສະຖິຕິແຫ່ງຊາດ, ຝ່າຍບັນຊີຕາມຫ້ອງການລັດ ແລະ ເອກະຊົນ ແລະ ອື່ນໆ.
ທັກສະ/ຄວາມສົນໃຈ
ມີຄວາມຮູ້ພື້ນຖານ ທາງດ້ານຄະນິດສາດ, ພາສາອັງກິດ, ຄອມພິວເຕີຂັ້ນພື້ນຖານ; ມີທັກສະ ໃນການຄິດໄລ່, ວິເຄາະ, ຈື່ຈໍາຮູບແບບ
ແລະ ແກ້ໄຂບັນຫາທົ່ວໄປ; ເປັນຄົນ ຫົວໄວ, ເຮັດວຽກຕາມຫຼັກການ
ຫຼື ຕາມສູດ, ເຂົ້າໃຈໄດ້ໄວ ໃນສິ່ງໃດໜຶ່ງທີ່ມີຄວາມຊັບຊ້ອນ, ມີຄວາມຈໍາດີ; ແລະ ມີຄວາມສົນໃຈ ໃນການຄິດໄລ່ ແລະ ຄິດຄົ້ນວິທີທາງໃນການຄິດໄລ່ໃໝ່ໆຢູ່ສະເໝີ.
ຈົບແລ້ວສາມາດ
ມີຄວາມສາມາດດ້ານການຄິດໄລ່; ການນໍາໃຊ້ໂປຣແກຣມທີ່ນໍາໃຊ້ສໍາລັບຄະນິດສາດ
ເຂົ້າຊ່ວຍໃນວຽກງານ ເກັບກຳສະຖິຕິ, ວາງແຜນ
ແລະ ຄິດໄລ່ປະເມີນຜົນ; ທັກສະໃນການສອນຄະນິດສາດ; ທັກສະໃນການວິເຄາະ ແລະ
ນໍາໃຊ້ຄະນິດສາດເຂົ້າໃນການແກ້ໄຂບັນຫາຕ່າງໆ; ແລະ ຮູ້ວິທີການໃນການຄົ້ນຄວ້າ ແລະ ເຮັດບົດວິໄຈຕ່າງໆ
ທີ່ມີການນຳໃຊ້ຄະນິດສາດເຂົ້າຊ່ວຍ.
ອາຊີບ
ເປັນຄູສອນຄະນິດສາດ ນັບຕັ້ງແຕ່ລະດັບປະຖົມ
ຈົນເຖິງຂັ້ນປະລິນຍາຕີ; ນັກຄົ້ນຄວ້າວິໄຈໃນຫຼາຍຂະແໜງການບໍ່ວ່າຈະເປັນທາງດ້ານການຄົ້ນຄວ້າ
ສູດຄິດໄລ່ ຟິຊິກ, ເຄມີ, ສະຖິຕິປະຊາກອນ, ຄິດໄລ່ພູມສາດ; ເປັນພະນັກງານຝ່າຍບັນຊີ, ບໍລິຫານທົ່ວໄປ, ພະນັກງານໃນສຳນັກງານພາກລັດ ແລະ ເອກະຊົນທີ່ກ່ຽວຂ້ອງ.
ທີ່ຕັ້ງ ແລະ ຕິດຕໍ່
ຄະນະ ວິທະຍາສາດ ທໍາມະຊາດ
ວິທະຍາເຂດດົງໂດກ, ມະຫາວິທະຍາໄລແຫ່ງຊາດລາວ
ບ້ານ ດົງໂດກ, ເມືອງ ໄຊທານີ, ນະຄອນຫຼວງວຽງຈັນ
ໂທ: 021 770173
ເວັບໄຊ້ www.fos.nuol.edu.la
ບໍລິການແລ່ນເອກະສານຕ່າງໆ ໃນ ສປປ.ລາວ 
