ກາຍະບຳບັດ ອະນຸປະລິນຍາ (ຊັ້ນສູງ) 3 ປີ, ປະລິນຍາຕຼີ 4 ປີ ຄະນະເຕັກ​ນິກ​ການ​ແພດ, ມະຫາວິທະຍາໄລ​ວິ​ທະ​ຍາ​ສາດ​ສຸ​ຂະ​ພາບ

ກາຍະບຳບັດ

ຫຼັກສູດ: ອະນຸປະລິນຍາ (ຊັ້ນສູງ) 3 ປີ, ປະລິນຍາຕຼີ 4 ປີ

ຄະນະເຕັກ​ນິກ​ການ​ແພດ, ມະຫາວິທະຍາໄລ​ວິ​ທະ​ຍາ​ສາດ​ສຸ​ຂະ​ພາບ

ນິຍາມ ແລະ ຄວາມສຳຄັນ

ກາ​ຍະ​ບຳ​ບັດ​ໝາຍ​ເຖິງ ການ​ຟື້ນ​ຟູ​ໜ້າ​ທີ່​ການ ​ການເຮັດ​ວຽກຂອງ​ຮ່າງ​ກາຍໃນກໍລະນີຄົນເຈັບທີ່ໄດ້​ຖືກສູນເສຍໜ້າທີ່ການ ຍ້ອນ ພະຍາດ ຫຼື ຖືກກະທົບຈາກອຸບັດຕິເຫດຕ່າງໆ​ ເຊັ່ນ: ຄົນເຈັບ​ທີ່ເປັນອຳມະພາດ, ຄົນເຈັບ​ທີ່ເສຍອົງຄະ ຫຼື ມີຄວາມ ບົກພ່ອງທາງຮ່າງກາຍໃນການເຄື່ອນໄຫວໄປມາ ​ ​ໂດຍມີຈຸດປະສົງເພື່ອ ຟື້ນຟູ ແລະ ເພີ່ມຄວາມສາມາດໃນການເຄື່ອນເໜັງ ແລະ ຫຼຸດຜ່ອນຄວາມເຈັບປວດ ​ເພື່ອເຮັດ​ໃຫ້​ຊີ​ວິດ​ການ​ເປັນ​ຢູ່ຂອງເຂົາເຈົ້າດີ​ຂື້ນ.

ວິຊານີ້ຮຽນກ່ຽວກັບຫຍັງ

ສາຂາ​ນີ້ ຮຽນກ່ຽວກັບຫຼັກ​ການການປິ່ນປົວຟື້ນຟູໜ້າທີ່ການ​ຂອງ​ຮ່າງ​ກາຍຂອງ​ຄົນ​ເຈັບ ​ທີ່ມີຄວາມບົກພ່ອງຂອງຮ່າງກາຍ ໃນການເຄື່ອນໄຫວໄປມາ ເຊິ່ງປະກອບມີ: ການປະເມີນຄົນ​ເຈັບ, ການວາງແຜນການ​ປີ່ນ​ປົວ ແລະ ຝຶກແອບດ້ວຍ ວິທີກາຍະບຳບັດຫຼາຍຮູບເເບບ ແລະ ວິທີຕ່າງໆ ເຊັ່ນ: ການຝຶກແອບການ​ເຄື່ອນ​ເໜັງ, ການນວດບຳ​ບັດ, ການໃຊ້ຄື້ນສຽງ ແລະ ຄວາມຮ້ອນ ເພື່ອຫຼຸດ​ຜ່ອນ​ຄວາມ​ເຈັບ​ປວດ. ນອກ​ຈາກນີ້ກໍ່​ຍັງ​ໄ​ດ້ນຳ​ໃຊ້ ແສງເລເຊີ ແລະ ເຕັກນິກອື່ນເຂົ້າ​ໃນ​ການ​ປີ່ນ​ປົວ​ຄົນ​ເຈັບ​ອີກ​ດ້ວຍ.

ວິທີການສິດສອນ

ວິທີ​ການ​ສິດສອນ​​ ລວມມີ ການສິດສອນແບບບັນລະຍາຍ ​ແລະ ການ​ຮຽນ​ໂດຍອີງໃສ່ການສຶກສາບັນຫາຂອງກໍລະນີ ຄົນເຈັບ ຕົວຈິງຈາກ​ການ​ແບ່ງເປັນກຸ່ມຍ່ອຍ; ມີການສາທິດຈາກອາຈານ ກ່ຽວກັບ​ ການຝຶກແອບກາຍະ​ບໍາບັດ​ ສໍາລັບຄົນເຈັບທີ່​ຕ້ອງການ ການ​ຟື້ນຟູ​ໜ້າທີ່​ການຂອງສ່ວນ​ຕ່າງໆຂອງ​ຮ່າງກາຍ ຢູ່ຫ້ອງປະຕິບັດການ. ຫຼັງຈາກນັ້ນ, ນັກສຶກສາ ຈະໄດ້ລົງຝຶກຫັດກາ​ຍະ​ບໍາບັດຕົວຈິງກັບຄົນເຈັບຢູ່ໂຮງໝໍ ແລະ ສູນການແພດຟຶ້ນຟູໜ້າທີ່ການ.

ທັກສະ/ຄວາມສົນໃຈ

ມີຄວາມຮູ້ພື້ນຖານ ດ້ານຊີວະ​ສາດ, ຟິຊິກສາດ, ເຄ​ມີ​ສາດ, ຄະນິດສາດ, ພາ​ສາ​ອັງ​ກິດ ແລະ ພາ​ສາ​ຝ​ຣັ່ງ. ນອກຈາກນີ້ແລ້ວ, ສິ່ງສຳຄັນທີ່ສຸດໃນ​ການ​ສຶກ​ສາ​ຮ່ຳ​ຮຽນ​ໃນ​ສາ​ຂາ​ວິ​ຊານີ້​ແມ່ນ ນັກຮຽນຈະຕ້ອງ​ເປັນ​ຄົນ​ທີ່ມີຈິດໃຈເອື້ອເຟື້ອເຜື່ອແຜ່, ມີມະນຸດ ສຳພັນທີ່ດີ, ມີຄວາມອົດທົນສູງ ແລະ ມີ​ຄວາມ​ສົນ​ໃຈ​ ຢາກຊ່ວຍ ເຫຼືອຄົນອື່ນ.

ຈົບແລ້ວສາມາດ

ສາມາດໃຫ້ການບໍລິການດ້ານກາຍະບຳບັດຮູບ​ແບບ​ຕ່າງໆ; ປະກອບສ່ວນເຂົ້າໃນວຽກງານສົ່ງເສີມສຸຂະພາບ ແລະ ຟື້ນຟູໜ້າທີ່ ການ ການ​ເຮັດ​ວຽກ​ຂອງ​ຮ່າງ​ກາຍຄົນເຈັບ; ສາມາດ ຝຶກອົບຮົມ ​ແລະ ມີທັກ​ສະ​ໃນ​ການໃຫ້ສຸຂະສຶກສາດ້ານກາຍະບຳບັດ ແກ່ຊຸມຊົນທີ່ຢູ່ຫ່າງໄກສອກຫຼີກ ແລະ ໃນສະຖານທີ່ບໍລິການ ສາທາລະນະສຸກ.

ອາຊີບ

ສາມາດ​ປະກອບ​ອາຊີບ ເປັນນັກກາຍະບຳບັດຢູ່ໃນໂຮງໝໍ ທັງ​ໃນ​ພາກລັດ ແລະ ເອກະຊົນ; ເປັນ​ອາ​ຈານ​ສອນ​ ໃນ​ພາກວິ​ຊາ​  ກາ​ຍະ​ບຳ​ບັດ ໃນ​ຄະ​ນະ​ເຕັກ​ນິກ​ການ​ແພດ​ ຂອງມະ​ຫາ​ວິ​ທະ​ຍາ​ໄລ​ວິ​ທ​ະ​ຍາ​ສາດ​ສຸ​ຂະ​ພາບ​; ​ແລະ ຍັງ​ສາມາດ ປະ​ກອບ​ອາ​ຊີບ​ອິດ​ສະຫຼະ​ເຊັ່ນ: ​ໃຫ້​ບໍ​ລິ​ການ​ດ້ານ​ກາ​ຍະ​ບຳ​ບັດ.

ທີ່ຕັ້ງ ແລະ ຕິດຕໍ່

ວິທະຍາໄລວິທະຍາສາດ ສຸຂະພາບ

ວິທະຍາເຂດ ເພຍວັດ

ຖະໜົນ ສາມແສນໄທ, ເມືອງ ສີສັດຕະນາກ, ນະຄອນຫຼວງວຽງຈັນ. ຕູ້ ປ.ນ 7444

ໂທ: 021 222883, ແຟັກ 021 2140 55

ອີເມວ: contact@uhs.edu.la.

ເວັບໄຊ໌ www.uhs.edu.la

ແຫຼ່ງຂໍ້ມູນ: https://collegemajor.la/