ສາຂາ ອິນຟໍເມຕິກບັນຊີ ວິທະຍາໄລເຕັກນິກ-ວິຊາຊີບມິດຕະພາບວຽງຈັນ-ຮ່າໂນ້ຍ
ອິນຟໍເມຕິກບັນຊີ
ຫຼັກສູດ: ຊັ້ນກາງ 2 ປີ
ວິທະຍາໄລເຕັກນິກ-ວິຊາຊີບມິດຕະພາບວຽງຈັນ-ຮ່າໂນ້ຍ
ນິຍາມ ແລະ ຄວາມສຳຄັນ
ອິນຟໍເມຕິກບັນຊີ ໝາຍເຖິງ ການຈັດການບັນຊີ
ໂດຍນໍາໃຊ້ລະບົບເຕັກໂນໂລຊີຄອມພິວເຕີ ທີ່ຖືກພັດທະນາຂຶ້ນ
ເພື່ອໃຫ້ມີການເກັບກໍາບັນຊີທີ່ສະດວກສະບາຍ ແລະ ເປັນລະບົບຂຶ້ນ. ປັດຈຸບັນ, ຮ້ານຄ້າ ຫຼື
ທຸລະກິດທຸກຂະໜາດ ລ້ວນແຕ່ ຕ້ອງມີການເກັບກຳບັນຊີ ເພື່ອໃຫ້ຮູ້ລາຍຈ່າຍ, ລາຍຮັບ, ຜົນກຳໄລ ແລະ ຂາດທຶນ.
ແຕ່ການຄວບຄຸມ ຕ້ອງໄດ້ສ້າງ ໂປຣແກຣມບັນຊີທີ່ຊັບຊ້ອນ
ເຊິ່ງຕ້ອງໄດ້ໃຊ້ຄວາມຮູ້ທັງການບັນຊີ ແລະ ຄອມພິວເຕີໄປນຳກັນ
ວິຊານີ້ຮຽນກ່ຽວກັບຫຍັງ
ອິນຟໍເມຕິກບັນຊີ ສຶກສາ
ກ່ຽວກັບການບັນຊີ ຄວບຄູ່ໄປກັບການຮຽນໃຊ້ ແລະ ສ້າງຊອຟແວຣ໌ ກ່ຽວກັບບັນຊີ ເຊິ່ງສາຂາ
ອິນຟໍເມຕິກບັນຊີ ຫຼື ຄອມພິວເຕີທຸລະກິດ
ແມ່ນການຮຽນທີ່ເນັ້ນໜັກໃສ່ການເຮັດບັນຊີທີ່ນຳໃຊ້ຄອມພິວເຕີເປັນເຄື່ອງມືຫຼັກ
ເນື່ອງຈາກການເຮັດບັນຊີແບບໃໝ່ ແມ່ນມີຄວາມຈຳເປັນທີ່ຕ້ອງສຶກສາແບບຕິດພັນກັບ
ເຕັກໂນໂລຊີ ແລະ ນໍາໃຊ້ຄອມພິວເຕີ ເຂົ້າໃນການຄວບຄຸມບັນຊີ
ບໍ່ວ່າຈະເປັນລະບົບບັນຊີຂະໜາດນ້ອຍ, ກາງ ຫຼື ໃຫຍ່.
ວິທີການສິດສອນ
ວິທີການສຶກສາ
ແມ່ນປະກອບມີພາກທິດສະດີ ແລະ ພາກປະຕິບັດຕົວຈິງໄປຄຽງຄູ່ກັນເຊັ່ນ: ການເຮັດບົດລາຍງານ, ບົດສະເໜີ ແລະ ບົດຝຶກຫັດ
ທີ່ຕິດພັນກັບການນໍາໃຊ້ບັນຊີແບບເອເລັກໂຕຣນິກ. ນອກນັ້ນ, ນັກສຶກສາ ຍັງຈະໄດ້ໄປ
ທັດສະນະສຶກສາ ຕາມສະຖານທີ່ຕ່າງໆ ທີ່ມີການນໍາໃຊ້ ລະບົບອິນຟໍເມຕິກບັນຊີ ແລະ ລົງຝຶກງານ
ກັບບັນດາອົງກອນ ແລະ ພາກສ່ວນທີ່ກ່ຽວຂ້ອງ ທັງໃນຫ້ອງການທາງພາກລັດ ແລະ ເອກະຊົນ.
ທັກສະ/ຄວາມສົນໃຈ
ຄວາມຮູ້ພື້ນຖານ ດ້ານ
ຄະນິດສາດ, ພາສາອັງກິດ ແລະ ຄອມພີວເຕີ ເປັນຕົ້ນແມ່ນ ການນໍາໃຊ້ໂປແກຣມ Word ແລະ Excel. ມີທັກສະ ໃນການຄໍານວນ, ວາງແຜນ ແລະ
ວິເຄາະສະຖານະການ. ມີຄວາມມັກຮັກດ້ານ ການບໍລິການ ແລະ ຄິດໄລ່ບັນຊີ. ເປັນຄົນ
ມີມະນຸດສຳພັນດີ, ຊື່ສັດ, ຍຸດຕິທຳ ແລະ ມີຄວາມຮັບຜິດຊອບສູງ.
ຈົບແລ້ວສາມາດ
ສາມາດ ສ້າງ, ເດີນ ແລະ
ສະຫຼຸບບັນຊີຕ່າງໆ ບໍ່ວ່າຈະເປັນບັນຊີວິສາຫະກິດ ແລະ ບັນຊີບໍລິຫານງົບປະມານ
ໂດຍການນໍາໃຊ້ ຄອມພິວເຕີ. ສາມາດນໍາໃຊ້ໂປຣແກຣມບັນຊີ, ຂຽນໂມດູນໂປຣແກຣມພື້ນຖານທີ່ນຳໃຊ້ໃນຂົງເຂດບັນຊີ, ການເງິນ ແລະ
ຄຸ້ມຄອງບັນຊີເປັນຕົ້ນ.
ອາຊີບ
ນັກສຶກສາ
ສາມາດເຮັດວຽກກັບບໍລິສັດ, ອົງການຈັດຕັ້ງຕ່າງໆ ທັງໃນພາກລັດ ແລະ
ເອກະຊົນ ທີ່ເຮັດວຽກກ່ຽວ ຂ້ອງກັບການຄິດໄລ່ ລາຍຮັບລາຍຈ່າຍ, ການເງິນ ແລະ ບັນຊີ.
ນອກຈາກນີ້, ນັກສຶກສາ ຍັງສາມາດນຳໃຊ້ຄວາມຮູ້ຄວາມສາມາດໃນການຄິດໄລ່ບັນຊີ
ເພື່ອບໍລິຫານ ທຸລະກິດຂອງຕົນເອງ ໄດ້ອີກດ້ວຍ.
ທີ່ຕັ້ງ ແລະ ຕິດຕໍ່
ວິທະຍາໄລ ເຕັກນິກວິຊາຊີບ
ມິດຕະພາບ ວຽງຈັນ-ຮ່າໂນ້ຍ
ຖະໜົນໜອງບອນ, ບ້ານ ນາໄຊ, ເມືອງ ໄຊເສດຖາ, ນະຄອນຫຼວງວຽງຈັນ
ໂທ: 021 412461, ແຟັກ: 021 453126
ອີເມວ: vihas@hotmail.com
ບໍລິການແລ່ນເອກະສານຕ່າງໆ ໃນ ສປປ.ລາວ 
